மியாவாக்கி மாதிரி காடுகள் உருவாக்க பதினெட்டு வழிமுறைகள் EIGHTEEN GUIDELINES OF MIYAWAKI FORESTS

மியாவாக்கி மாதிரி காடுகள் உருவாக்க

பதினெட்டு வழிமுறைகள்

EIGHTEEN GUIDELINES OF

MIYAWAKI  FORESTS

மியாவாக்கி என்பவர் யார் ? மியாவாக்கி மாடல் காடுகள் என்றால் என்ன ? அதனை நாம் எப்படி செய்யலாம் ? இவை எல்லாமே ஓரளவுக்கு நமக்கு தெரிந்தவை தான், ஆனால் ‘மேன் மேய்ட்  பாரஸ்ட்’ என்று சொல்லும் மக்களால் உருவாக்கப்படும் காடுகளை எப்படி அவர் உருவாக்கினார், நாம் அவற்றை மக்கள் காடுகள் என்று சொல்லலாம், ‘பீப்பிள்ஸ் ஃபாரெஸ்ட்’. பேரு என்னவேணும்னாலும் வைக்கலாம், ஆனா அது பேருக்கு இருக்கக்கூடாது, என்ன சொல்றீங்க ? 

மியாவாகி ஜப்பான்காரர், தொண்ணூற்று இரண்டு வயசு இளைஞர், தாவரவியல் அறிவியல் வல்லுநர், காடுகள் உருவாக்குவதில் நிபுணர், சர்வதேச அளவில் அதற்காக ‘புளூ பிளானட் அவார்ட்’ வழங்கப்பட்டவர், இதுவரை 40 மில்லியன் மரங்களை நட்டவர் என்ற சாதனையாளர், இவர் பெயரில்தான் இந்த அடர் நடவு காடுகள் உலகம் முழுவதும் உருவாக்கப்பட்டு வருகின்றன.  

மியாவாக்கியின் காடுவளர்ப்பு அனுபவங்களில் நமக்கு பயன்படக்கூடிய அனுபவங்களை மட்டும் இந்த பதிவில் பார்க்கலாம். 

சிறுவனங்கள் உருவாக்குவதில் உள்ளூர் மரங்களைத் தேர்வு செய்வது, அருகிவரும் மரங்களைக் கண்டுபிடிப்பது, மரங்களின் தலைப்பகுதியை வைத்து மரங்களை வகைப்படுத்த கற்றுக்கொள்ளுதல், கிராமங்களில் உள்ளூர் மரங்களின் விதைகளைச் சேகரித்தல்,  அவற்றிலிருந்து கன்றுகளை  உருவாக்குதல், கோயில்கள் இடுகாடுகள், மற்றும் கல்லறைகளில்  சிறு வனங்களை உருவாக்குதல், கிராமப்புற பொது இடங்கள், குளம்குட்டை ஏரிக்கரைகள், நகர்ப்புறங்கள், மலைப்பகுதிகள் ஆகியவற்றில் மரங்களை நிரப்புதல் இதெல்லாம்தான் மியாவாக்கியின் பாக்கெட்டிலிருந்து நாம் உருவவேண்டிய சமாச்சாரங்கள். 

மியாவாக்கி ஒரு தாவரவியல் அறிஞர் தாவரங்களைப் பற்றி படித்தவர் தாவரங்கள் பற்றி அக்குவேறு ஆணிவேராக ஆய்ந்து ஆராய்ச்சி செய்தவர்.

விதைகள் இயற்கை காடுகள் ஆகியவற்றில் ஆழமான அறிவும் அனுபவமும் உள்ளவர், உலகம் முழுவதும் அறியப் பட்டவர்.

 

குறிப்பாக மெலிந்து போன நலிந்து போன காடுகளில் ஓட்டை உடைசல்களை பழுதுபார்த்து வளமான காடுகளாக மீண்டும் உருவாக்குவதில் வல்லவர்.

 

ஹிரோஷிமா யுனிவர்சிட்டி மற்றும் டோக்கியோ யுனிவர்சிட்டியில் பட்டப்படிப்பு படித்தவர், இதுவரைக்கும் இவர் ஆற்றிய பணிகளுக்காக புளூ பிளானட் அவார்டு (BLUE PLANET AWARD) என்ற விருதினைப் பெற்றவர்.

 

1960 ஆம் ஆண்டு ஜப்பானில் உள்ள பாரம்பரியமான காடுகளை ஆய்வு செய்தார், அவற்றில் மெல்ல அழிந்துபோன அறுநூறுக்கும் மேற்பட்ட காடுகளை பேருக்கு காடுகளாக இல்லாமல் பெயர்பெற்ற காடுகளாக மாற்றினார்.

பாரம்பரியமான காடுகள் காலப்போக்கில் மதிப்புமிக்க மரங்களை எல்லாம் இழந்திருக்கும், அதில் பெரும்பகுதி முட்புதர்களாய் மண்டிக்கிடக்கும்.

 

அப்படி அழிந்துபோன காடுகளில் அவர் எப்படி சரி செய்தார் அதற்கு எப்படிப்பட்ட வழிமுறைகளைக் கையாண்டார் என்று பார்க்கலாம்.

 

1. அழிந்துபோன காடுகளில் அதிகபட்சமாக எவ்வளவு மரக்கன்றுகளை நட முடியுமோ அவ்வளவும் நடவேண்டும், அங்கு காலியாக இருக்கும் நிலப்பரப்பிற்கு ஏற்ப கன்றுகளை நட வேண்டும்.

 

2. அப்படி அவர் தேர்வு செய்யும் மரங்கள் எல்லாம் உள்ளூர் பிரபலங்களாக இருக்க வேண்டும், அந்தப் பகுதிக்கு உரிய மரங்களாக இருக்க வேண்டும்.

 

3. பெரிய, அகன்ற, அடர்த்தியான தலை பகுதி உடைய, பசுமை மாறாத மரங்களாக இருக்க வேண்டும்.

 

4. நாம் தேர்வுசெய்யும் மரங்கள் ஒரே வகை மரங்களாக இருக்கக்கூடாது, பல வகை மரங்களைத் தேர்வு செய்து நடவேண்டும்.

 

5. பல வகை மரங்களை தேர்வு செய்யும்போது பரந்தும் நீண்டும் வளரும் தன்மை உடைய மரங்களையும் அங்கொன்றும் இங்கொன்றுமாக இருக்குமாறு நட வேண்டும்.

 

6. நீங்கள் நடும் மரங்கள் 5 ஆண்டுகளில் நான்கு மீட்டரும் 10 ஆண்டுகளில் 8 மீட்டரும் 20 ஆண்டுகளில் 25 மீட்டர் உயரமாகவும் வளர வேண்டும்.

 

7. இந்த மரங்களை நட்டு முடிந்த பிறகு 3 ஆண்டுகளுக்குப்பின் எவ்விதமான பராமரிப்பும் இதற்குத் தேவையில்லை.

 

8. மரங்களை நடுவது நிறுவனங்களை உருவாக்குவதில் நலிவடைந்த காடுகளை மீண்டும் உருவாக்குவது போன்ற எல்லா வேலைகளுக்கும் மியாவாக்கி முறை சிறந்ததாக இருக்கும் என்று உறுதியளிக்கிறார் மியாவாக்கி.

 

9. குளிர்ச்சியான தட்பவெப்பநிலைப் பகுதிகள், வெப்ப மண்டலப் பகுதிகள் ஆகியவற்றில் புதிய காடுகளை உருவாக்கவும் பழைய நலிவுற்ற காடுகளை சரிசெய்யவும் அடர்வன முறையை பயன்படுத்த முடியும் என்கிறார் மியாவாக்கி.

 

10. பல்லுயிர் ஓம்புதல், கார்பன் டை ஆக்சைடு வாயுவை கவர்ந்து இழுத்து சேமித்தல், சுவாசிக்க ஆக்சிஜன் தருதல், மண் அரிமானத்தை தடை செய்தல் போன்ற முக்கியமான பணிகள் அனைத்தையும் மியாவாக்கி முறையில் உருவாக்கிய அனைத்து மரங்களும் காடுகளும் செய்யும் என்றும் அவர் உறுதியளிக்கிறார்.

 

11. அதிக உயரமான தலை அமைப்பு கொண்டவை, நடுத்தர உயரமாக அமைப்பு கொண்டவை, சிறியவை மற்றும் புதர்ச்செடிகள் என்று நான்கு விதமாக மரங்களை வகைப்படுத்துகிறார்.

12. நாற்றங்காலில் விதைகளை விதையுங்கள்,  முளைத்து வரும் கன்றுகளில் இரண்டு மூன்று இலைகள் வந்தவுடன் அவற்றைத் தொட்டிக்கு அல்லது பாலித்தீன் பைகளுக்கு மாற்றுங்கள்.

13. தொட்டிகள் அல்லது பாலிதீன் பைகளில் வேர்கள் நிரம்பும் அளவிற்கு அவற்றை வளர்த்து பிறகு நடவு செய்யுங்கள்.

 

15. தொட்டியில் நடவு செய்த பிறகு 60 சதம் வெயில் குறைக்கப்பட்ட நிழலறையில் வைத்து ஒன்று அல்லது இரண்டு மாதங்கள் பராமரிக்க வேண்டும்.

16. அதன் பின்னர் அந்த தொட்டிச் செடிகளை 40% வரை வெயில் குறைக்கப்பட்ட நிலையில் நிழலறையில் வைத்து ஒன்றிரண்டு மாதங்கள் பராமரிக்கவேண்டும்.

17. பின்னர்  இயற்கையான சூழலில் அந்த கன்றுகளை ஒரு வாரம் முதல் ஒரு மாதம்வரை வைத்திருந்து பராமரிக்க வேண்டும்.

18. அதன் பிறகு அந்த கன்றுகளை எடுத்து நடவு செய்ய வேண்டிய இடங்களில் நடலாம்.

0000000000

 

இந்தியா முழுக்க இப்போது மியாவாக்கி முறையில் சிறுவனம் உருவாக்குவது அறிமுகமாகி உள்ளது, ஆனாலும் கூட விதை சேகரம் செய்து கன்றுகளை உருவாக்குவதில்லை, கையில காசு வாயில தோசை கிடைக்குமா என்றுதான் பார்க்கிறோம்.

 

இப்படி மரங்களை சேகரிப்பதற்காக விதை வங்கிகளை எப்படி அவர் தொடங்கினார் ?

 

அந்த விதை வங்கிகள் மூலமாக எப்படி கன்றுகளை தயாரித்து அதை எப்படி பல்வேறு இடங்களில் அதை காடுகளை உருவாக்க பயன்படுத்தினார் ?

கோவில்கள், இடுகாடுகள் மற்றும்  கல்லறைகளில் இருந்த தோட்டங்களை எப்படி சீரமைத்தார் ? 

ஜப்பான் தவிர இதர நாடுகளில் எப்படி காடுகள் உருவாக்கும் பணியை விரிவுபடுத்தினார் என  தனியாக ஒரு கட்டுரையில் பார்க்கலாம். இது பற்றி உங்களுக்கு அனுபவங்கள், சொல்ல தகவல்கள் அதாவது இருந்தால் எனக்கு சொல்லுங்கள்.

எழுதியவர்: அக்ரி தே.ஞான சூரிய பகவான், (முன்னாள் பண்ணை வானொலி அலுவலர், அகில இந்திய வானொலி) தலைவர், பூமி இயற்கைவள பாதுகாப்பு மையம், தெக்குப்பட்டு, திருப்பத்தூர் மாவட்டம் – 635801, போன்: +91 8526195370, இமெயில்: bhumii.trust@gmail.com

FOR FURTHER READING:

www.mitsubshicorp.com / Recreating Native Forests with Native Trees

www.en.m.wikipedia.org / Akira Miyawaki

www.reforestation.com /Akira Miyawaki, Creator of Primary Forests / Reforest Action

www.researchgate,net/ Effectiveness of the Miyawaki method in Mediteraranean forest

0000000000000000000000000

இடி மின்னலிலிருந்து தப்பிப்பது எப்படி - HOW TO ESCAPE FROM LIGHTENING & THUNDER

இடி  மின்னலிலிருந்து தப்பிப்பது எப்படி 

HOW TO ESCAPE FROM LIGHTENING & THUNDER

தமிழ் இலக்கியம் போல உலகில் எந்த இலக்கியமும் வாழ்க்கையை பிரதிபலிக்காது என்று சொல்லுவார்கள் அறிஞர் பெருமக்கள்,  இன்றைய நமது தலைப்புக்கு ஏற்றதொரு தமிழ் பாட்டு, சின்ன வயதில் படித்தது, அநேகமாய் உங்களுக்கும் தெரிந்திருக்கும், மழை அறிகுறிகள் பற்றிய பாடும் கூட பள்ளி என்னும் தமிழ் இலக்கிய பாடல்

ஆற்று வெள்ளம் நாளை வரத்

தோற்றுதே குறி மலை

யாள மின்னல் ஈழ மின்னல்

சூழ மின்னுதே

நேற்றும் இன்றும் கொம்புசுற்றிக்

காற்றடிக்குதே - கேணி

நீர்ப்படு  சொறித்தவளை

கூப்பிடுதே

சேற்று நண்டு சேற்றில் வளை

ஏற்று அடைக்குதே -  மழை

தேடி ஒருகோடி வானம்

பாடியாடுதே

போற்று திருமால் அழகர்க்கு

ஏற்றமாம் பண்ணைச் சேரி

பள்ளிப் பள்ளர் ஆடிப்பாடித்

துள்ளிக் கொள்வோமே

(முக்கூடற்பள்ளு – 30)

ஒரு காலத்தில் தமிழ் மக்கள் மழைக்கு விழா எடுத்து அதனை இந்திர விழா என்று விமர்சையாக கொண்டாடினார்கள், இந்திரன் என்னும் தெய்வத்தை மழைக்கான கடவுளாக வணங்கினார்கள்.

 

00000000000000000000000000

இடிமின்னல் தாக்குதலால் சமீபத்தில் 83 பேர் பீஹார் மாநிலத்தில் இறந்திருக்கிறார்கள், இது ஒரே நாளில் பீகார் மாநிலத்தின் 13 மாவட்டங்களில் நடந்துள்ளது, இது பல பத்திரிகைகளில் செய்தியாகவும் வந்துள்ளது.

 

இவர்கள் எல்லோருமே வயல்களில் அல்லது திறந்த வெளிகளில் வேலை பார்த்துக் கொண்டு இருந்தவர்கள், ஒன்று விவசாயிகளாக இருக்கும் அல்லது  தொழிலளிகளாக இருக்கும்.

பொதுவாக பருவமழைக் காலங்களில் இந்த இடி மின்னல் பலமாக இருக்கும், இந்தத் தகவலை எனக்கு டாக்டர் ஏ.வி. பாலசுப்பிரமணியன் என்ற ஒரு நண்பர் வாட்ஸ் அப்பில் அனுப்பி இருந்தார், அவர் சென்னையில் நுங்கம்பாக்கம் வானிலை ஆராய்ச்சி நிலையத்தில் அதிகாரியாக வேலை பார்க்கிறார்.

 

தென்மேற்கு பருவமழை தொடங்கியிருக்கும் இந்த சமயத்தில் இடி மின்னல் தாக்குதலில் இருந்து தப்பிக்க வழி முறைகளைச் சொல்லலாம், இது முக்கியமாக கிராமப்புற மக்களுக்கு உதவியாக இருக்கும்  என்று நினைத்தேன்.

 

அவரிடமே ஆலோசனை கேட்டேன் அவரும் ஒரு சிறிய வீடியோ படம் ஒன்றை அனுப்பியிருந்தார், அது சுருக்கமாக இருந்தாலும் பயனுள்ள பல தகவல்கள் இருந்தது. 

அதன்பின்னர் தமிழ்நாடு அரசின் மின் உற்பத்தி பகிர்மான கழகத்தின் எச்சரிக்கை செய்திகள் கிடைத்தது, அவற்றை எல்லாம் தொகுத்து உங்களுக்காக இங்கு தந்துள்ளேன்.

 

1. இடியும் மின்னலும் ஏற்படும்போது திறந்த வெளிகளில் இருக்கக் கூடாது, நிற்பது, நடப்பது, வேறு எந்த வேலையும் செய்துகொண்டிருக்கக் கூடாது, காரணம் வெட்டவெளிகளில் எது உயரமான பொருளோ அதன்மீது தான் அதன் தாக்குதல் இருக்கும்.

2. இடி மின்னல் லேசான மழை என்று ஏற்படும்போதே உடனடியாக ஏதாச்சும் ஒரு கான்கிரீட் அமைக்கப்பட்ட கட்டிடத்திற்குள் சென்றுவிடவேண்டும், பஸ், கார் போன்ற வாகனங்களுக்குள் சென்று அமர்ந்து கொள்ளலாம். அதுதான் இடிமின்னல் தாக்காமல் இருக்க பாதுகாப்பு.

3. கண்டிப்பாக குடிசைகள், மரத்தடி, பேருந்து நிழற்குடை ஆகியவற்றில் ஒதுங்குதல் கூடாது, அவை பாதுகாப்பனவை அல்ல.

 

4. தண்ணீர் தேங்கி இருக்கும் நீர் நிலைகளை விட்டு விலகி இருக்க வேண்டும், குளம் குட்டை, போன்றவற்றிலிருந்து  விலகி இருத்தல்  பாதுகாப்பனது.

5.கொரோனா நிமித்தமாக டீவியில் பதினோராவது முறையாக ரிடெலிகாஸ்ட் பார்த்து அழுது கொண்டிருப்பார்கள், அவர்கள்  டீவியை ஆஃப் செய்யவேண்டும்.

6. மிக்ஸி, கிரைண்டர், வாஷிங்க் மெஷின் என்று சிலர் கருமமே கண்ணாயிருப்பார்கள், அவர்கள்  அந்தந்த மெஷிங்களை ஆஃப் செய்யவேண்டும். 

6. கர்ணன் காதில் குண்டலத்தோடு பிறந்தது மாதிரி எப்போதும் செல்போனும் காதுமாக திரிவார்கள், செல்போனை பிடுங்கிவைத்து அவர்களை காப்பாற்றுங்கள்.

7. ராத்திரி பகல் தெரியாமல் சிலர் கம்ப்யூட்டரில் கேம் விளையாடிகொண்டிருப்பார்கள், அவர்களிடம் கடிகாரம் அல்லது காலண்டரி காட்டி, அதனை ஆஃப் செய்யவேண்டும்.

8. மிக்ஸி, கிரைண்டர், வாஷிங் மெஷின், செல்போன்,  கம்ப்யூட்டர், அகியவை தேவைப்படாதபோது மெயின் சுவிட்சை ஆஃப் செய்து வையுங்கள்.

9. மின்வாரியத்தின்மீது இருக்கும் கோபத்தின் காரணமாக அதன் டிரான்ஸ்மிட்டர்கள், மற்றும் துணை மின் நிலையங்களுக்கு அறுகில் சிறுநீர் கழிக்காதீர்கள்.

10. இடிமின்னல் சமயம், அங்கேயே நின்று அடுத்தவர் பற்றி மணிக்கணக்காய்  புறணி பேசாதீர்கள்.

11. இடிமின்னல் சமயம் மின்சாரக்கம்பிகள் அறுந்து கிடந்தால், அதனை கொண்டுபோய் பழைய இரும்புகடையில் போட்டால் எவ்வளவு கிடைக்கும் என்று யோசிக்காதீர்கள், அதன் அருகில் போகாமல் உடனடியாக ‘இபி’ ஆபீசுக்கு தகவல் சொல்லுங்கள்.

12.மின்சார கம்பங்களைத் தொட்டு தங்கள் வீரத்தைக் காட்டுவது, அவற்றைப் பிடித்துகொண்டு தொங்குவது, விளையாடுவது, அதில் ஆடுமாடு, நாய்களைக் கட்டுவது, துணிகளைக் காயப்போடுவது போன்றவற்றை தவிர்க்கவேண்டும்.

13. சில கட்டிடங்கள் மிகவும் பழமையாக இருக்கும், அவற்றின் மின்சார ஒயர்கள் இத்துப்போயிருக்கும், அப்படிப்பட்ட சுவர்களில் ஆணிகளை அடிப்பது ஆபத்தானது. 

14. மழைக்காலத்தில் மின்சாரத்தால் தீவிபத்து ஏற்படும் வாய்ப்பு உண்டு, அதனை  அணைக்க தண்ணீர் ஊற்றக் கூடாது, இதற்கு பதிலாக உலர்ந்த மண்னை பயன்படுத்தலாம், 

15. இதற்கு உடனடியாக மெயின் ஸ்விட்சை அணைத்துவிட வேண்டும், கம்பளிப் போர்வையை பயன்படுத்தலாம், தீயணைப்புக்கு கார்பன் டை ஆக்சைடை பயன்படுத்தும் தீயணைப்பான்களை மட்டுமே உபயோகப்படுத்த வேண்டும்.

 

தமிழ்நாடு அரசின் மின் உற்பத்தி பகிர்மான கழகத்திற்கு உங்கள் சார்பில் எனது நன்றியினை தெரிவித்துக்கொள்ளுகிறேன்.

இப்போது இந்த இடியும் மின்னலும் எப்படி உருவாகின்றன, இடியும் மின்னலும் ஒன்றா வெவ்வேறா ? கொஞ்சமாக சயின்ஸ் பார்க்கலாம்.

 

பூமியின் மேலே உள்ள காற்று வெப்பத்தினால் சூடாகிறது, அதன்பின் அது மேலே ஏறுகிறது, ஒரு குறிப்பிட்ட உயரத்திற்கு போனபின்னர் அது குளிர்கிறது.

 

அது மழைத் திவலைகளை  உள்ளடக்கிய மழை மேகமாக மாறுகிறது, மழை மேகத்தின் மையப் பகுதிகளில் ‘அயனிகள் கவர்தல்’ என்னும் செயலால் அங்கு மின்சாரம் உருவாகிறது, இதுதான் மின்னல்.

 

இந்த மழை மேகத்தின் மத்தியிலே உருவாகும் மின்சாரம்தான் ஒளியையும் வெப்பத்தையும் அதிக அளவு வெளியிடுகிறது,

 

இந்த மின்சாரம் உற்பத்தி  ஆகும் நேரம் கால்நொடி என்று கணக்கிட்டிருக்கிறார்கள், இந்த கால் நொடியில்தான்  இந்த இடியும் மின்னலும் இறங்குகின்றன.

இப்படி உருவாகும் மின்னல்களில் மூன்று வகைகள் உண்டு, ஒரே மேகத்திற்குள் ஏற்படுகின்ற மின்னலும் இடியும் ஒருவகை,  இரண்டாவது ஒரு மேகத்திற்கும் இன்னொரு மேகத்திற்கும் இடையே தோன்றுவது,  மூன்றாவது வகை வானத்து மேகத்திற்கும் பூமிக்கும் இடையே ஏற்படும் மின்னல்.

 

இதுதான் மரங்கள் கட்டிடங்கள் மற்றும் உயரமான பொருட்கள் மற்றும் மனிதர்களின் மீது விழுந்து அழிவையும் உயிரிழப்பையும் ஏற்படுத்துவது.

மின்னல் எந்த நிறத்தில் தோன்றும் ? பார்த்திருக்கிறீர்களா  ? மின்னல் வெள்ளை வெளேர் என்று இருக்கும், அதாவது வெள்ளை நிறத்தில் இருக்கும், அந்த வெள்ளையுடன் கொஞ்சம் நீலம் சேர்த்த மாதிரி இருக்கும்.

 

சில சமயங்களில் அழகான மஞ்சள் மற்றும் ஆரஞ்சு நிறமாக கூட இருக்கும் மின்னல் வெட்டும்.

 

மின்னலும் இடியும்  ஏற்படும் போது போது வெப்பம் ஏற்படும், அப்படி ஏற்படும் வெப்பம் எவ்வளவு இருக்கும் என்று தெரியுமா ? இது சூரியனின் மேற்பரப்பு வெப்பம் மாதிரி ஆறு மடங்கு இருக்குமாம்.

இந்த சமயத்தில் சூடான வெப்பக்காற்று சட்டென்று குளிரும்போது ஒரு அதிர்வாக வெளிப்படுகிறது,  அந்த அதிர்வின் ஒலிதான் இடி என்பது.

பெரும்பாலும் நாம் என்ன நினைத்து இருக்கிறோம் மின்னலும் இடியும் கெட்டது மட்டும் தான் செய்யும் என்று நினைக்கிறோம், பல நல்ல காரியங்களையும் செய்கின்றன.

 

இரண்டு நல்ல காரியங்களை பார்க்கலாம்.

உதாரணமாக நைட்ரஜனை நைட்ரேட் ஆக அம்மோனியாவாக மாற்றித் தரும் வேலையையும் அது செய்கிறது, அந்த  வடிவத்தில் இருக்கும்போதுதான் தாவரங்கள் வளிமண்டலத்தில் 78% நைட்ரஜன் வாயு வடிவில் இருக்கிறது என்பதனை நாம் அறிவோம், ஆனால் இதனை தாவரங்கள் அல்லது பிராணிகள் நேரிடையாக பயன்படுத்த முடியாது, வளி மண்டலம் என்றால் காற்று மண்டலம்.

 

தாவரங்களின் வேர் முடிச்சுக்களில்  பாக்டீரியாக்கள் இருப்பது நமக்குத் தெரியும், இந்த பேக்டீரியாக்கள் இந்த வேர்முடிச்சுகளின் தயவில் தங்கியிருக்கின்றன,  இந்த வேர் முடிச்சுகளுக்கு உதவ நினைக்கும் இந்த பக்டீரியாக்கள், காற்றுமண்டல நைட்ரஜனை தாவரங்கள் பயன்படுத்தும் வகையில் மாற்றித் தருகின்றன. 

நைட்ரேட்டுகள் மற்றும் அம்மோனியாவாக இருக்கும் நைட்ரஜன் சத்துக்களை தாவரங்கள் மற்றும் பயிர்கள் சுலபமாக பயன்படுத்த முடியும்.

அதே காரியத்தை மின்னல்களும் செய்கின்றன, ஓராண்டில் இந்த பிரபஞ்சத்தில் வாழும் உயிரினங்கள் பயன்படுத்தும் பாதிக்கும் மேற்பட்ட நைட்ரேட்டுகள் மற்றும் அம்மொனியாவை மின்னல்கள்தான் உற்பத்தி செய்து தருகின்றன.

அதுமட்டுமல்ல, ஓசோனை உற்பத்தி செய்யும் உருப்படியான காரியத்தையும் செய்கின்றன இடியும் மின்னலும், சூரியனின் புரா ஊதாக்கதிர்களிலிருந்தும் பாதுகாக்கும் பணியினை  செய்கிறது ஓசோன் என்பது எல்லோருக்கும் தெரியும். 

 

000000000000000000

இன்னொரு ஆச்சரியமான செய்தி, இடி மின்னல் நாடு என்று அழைக்கின்ற ஒரு நாடு இருக்கிறது, அதற்கு இடிமின்னல் தேசமென்றே பெயர், இந்தியாவின் தங்கை என்று சொல்லக்கூடிய பூட்டான் தேசம்தான் அது.

 

தண்டர் டிராகன் என்பதுதான் பூட்டான் நாட்டின் தேசிய சின்னமும் கூட, பூட்டான் நாட்டின் தேசியக்கொடியில் இந்த தண்டர் டிராகன் உள்ளது, இந்த தண்டர் டிராகன் பாம்புகள் கர்ஜிக்கும் ஓசைதான் இடிகள் இடிப்பது என பூட்டான் தேசத்து மக்கள் நம்புகிறார்கள்.

000000000000000000000000000

எழுதியவர்: தே.ஞான சூரிய பகவான், தலைவர், பூமி இயற்கைவள பாதுகாப்பு மையம், தெக்குப்பட்டு, திருப்பத்தூர் மாவட்டம் – 635801, போன்: +91 8526195370,

இமெயில்: bhumii.trust@gmail.com

FOR FURTHER READING:

www.tamilvu.org/ Palliyar Easal – Tamil Virtual University

www.365paa.wordpress.com / Mukkudarpallu

www.ta.m.wikipedia.org / Mukkudarpallu

www.quora.com / Why Bhutan called the Land of the Thunder Dragon

www.m.economic times.com/ Butan – The Land of Thuder Dragon – The Economic Times

0000000000000000000000000