புங்கன் டீசல் எண்ணெய் உற்பத்தி மரம் PUNGAN BIO DIESEL PRODUCING TREE

                                                         

  புங்கன் 

டீசல் எண்ணெய்

உற்பத்தி மரம்

 

PUNGAN 

BIO DIESEL

PRODUCING

TREE 

                                                                       (புங்க மரம்)

                                     தாவரவியல் பெயர்:-- டெர்ரிஸ் இண்டிகா (DERRIS INDICA)
                                         தாவரக் குடும்பம்:--  ஃபேபேசியே  (FABACEAE)
                                                       பொதுப்  பெயர்: புங்கம் (PUNGAM)


தமிழ் இலக்கியங்களில் அகம் சார்ந்த பாடல்கள் கூட  இயற்கையைப்  பரதிபலிக்காமல் இருக்காது என்பார்கள்.

அப்படி ஒரு பாடலில் , தலைவனைப் பிரிந்த தலைவி அவனுக்காக காத்திருக்கிறாள்; அப்போது  வேனில் என்ற வெயில் முடிந்து இளவேனில் மழையை வருவிக்கிறது;  ஆறு நிரம்பி ஓடுகிறது ;  கரையோர மரங்களில் மலர்கள் குலுங்குகின்றன் இதனை கலித்தொகை பாடல் ஒன்று காட்சிப்படுத்துகிறது.

'செவ்விலவு மரங்கள்  நெருப்பை அணிந்துக் கொண்டிருக்கின்றன.  பொறியினை  வாரி இறைத்ததைப்          போல   புங்க மலர்கள்  உதிர்ந்து
கிடக்கின்றன  !  கோங்கம் பூக்கள்  பொன்தூள் போல சிதறிக்கிடக்கின்றன. இந்த  மலர் சூடும்படி  என்னவன் வரவில்லையே ... "
 
இந்த அற்புதமான காட்சியை சொல்லும் பாடல்  இது.

'எரிஉரு  உறழ  இலவம்  மலர
பொறிஉரு  உறழ  புன்குபூ  உதிரப்
புதுமலர்க்  கோங்கம்  பொன்னைத்  தாதூழிப்பத்
தமியார்ப்   பிறந்துஎறிந்து  எள்ளி முனிய வந்து
ஆர்ப்பது   போலும்  பொழுது;   என் அணிநலம் . "

யார் சொன்னார்கள் ..?  நான்கு சுவர்களுக்கு இடையேதான் குளிர் சாதனம் செய்ய முடியுமென்று  ..?

நான்கு மூலை  ரோட்டில்கூட குளிர்சாதனம் செய்யலாம்;  அய்ந்தாறு புங்கம் மரங்களை நட்டுப் பாருங்கள் ! 

குளிர்சாதனம் காற்றுக்கு குளிர்ச்சி மட்டும்தான் கொடுக்கும்; ஆனால் இம்மரத்தின் தழை காற்றில் கரைந்திருக்கும் தூசையும், மாசையும் துப்புரவாய் துடைத்துத் தரும் !

கோடுகளை வளைத்துப் போட்டால்தான் அவை சித்திரமாகும். அது போல புங்கன் கிளைகள் கோணல் மாணலாய் இருந்தாலும், அழகாய் வளரும்; 

முழுசாய் பயன்படுத்தப் படாத மரங்கள் என்று பட்டியல் போட்டால், அது முன்னூரைத்  தாண்டும் !  அதில் பிரதானமான ஒன்று தான்  புங்க மரம் !

இலைகள் தோல் பதனிடும் தொழிலுக்கு உதவும்; பயிருக்கு  உரமாக்கலாம்;  தானியம் குதிர்களில் இலைப்பொடி இட்டு  பூச்சிகள்;  வராமல்  அடித்து விரட்டலாம்.

விதைகளில் வடிக்கும் எண்ணெயில் சோப்பு செய்யலாம்;   தோல் பதனிடலாம்;  டீசல் தயாரிக்கலாம்;   வேம்பு எண்ணெய்ப் போலவே புங்கன் எண்ணெய்யும் பூச்சிகளை விரட்ட புத்திசாலித்தனமாய், உபயோகப்படுத்தலாம்.

எனக்கு அரைக்கால் சட்டை வயசிலேயே  அறிமுகமானது புங்கன் கொட்டைகள்தான்;  அவற்றை நான் தாயத்து என்று நினைத்திருந்தேன் ;குழந்தைகள் கழுத்திலும், அரைஞாண் கயிற்றிலும் கட்டிக்கொண்டு இருப்;பார்கள்; பேய் பிசாசு வராது எனபார்கள்.

புங்கன் கொட்டைகள் பார்க்க அழகாய் இருக்கும்; தொட்டுப் பார்க்க மெத்தென இருக்கும்; முதிர்ந்த விதைகள் பார்க்க  'லெதர்; கோட் "  போட்டது மாதிரி  தெரியும் !

புங்கன் மரத்தை தோட்டத்தைச்  சுற்றிலும் நட்டால் அது காற்றுத்தடுப்பு மரம்; வயலில் நட்டால் அது  தழை உர மரம் ;மண்ணில் நட்டால் அது காற்றுஅரிப்பு தடுப்பு மரம் ;சரிவு நிலங்களில் நட்டால் அது மண்அரிப்பு தடுப்பு மரம் ;சாலைகளில்  நட்டால்  அது  நிழல்  மரம ;பூங்காக்களில் நட்டால் அது பூ மரம்; சாகுபடிக்கு நட்டால் அது எண்ணெய்  மரம்; ஆனால்; எங்கு நட்டாலும் அது பருவகால மாற்றத்திற்கு மருந்து  மரம் ! எப்படி நட்டாலும் அது பருவகால மாற்றத்திற்கு  தடுப்பு மரம் !

மணல்சாரி, செவ்வல், கரிசல், உவர் இப்படி எத்த்தனை வகை மணணாக இருந்தாலும்  புங்கன் சாதனை நிகழ்த்தும் !

உகாண்டா,  கேமரூன், ஆகிய ஆப்பிரிக்க நாடுகளில், பாலைவனம் பரவுவதைத் தடுக்கும் ஆராய்ச்சிகள் நடைபெற்று வருகின்றன.

இதற்காக புதிய புங்கன் விதை ஒன்றை தெரிந்தெடுத்திருக்கிறார்கள்; இதன் தாவரவியல் பெயர் மில்லேஷியா  பின்னேட்டா (MILLETIA PINNATA )

புங்கன் மரம் ஒரு புதையல் மரம் ! எல்லோரும் சொல்கிறார்கள் இது பயோ டீசல் தரும் என்று ! அங்கொன்றும் இங்கொன்றும் ஆமை வேகத்தில், சில ஆய்வுகள் நடக்கின்றன் இந்த ஆய்வுகள் வெற்றி கண்டால், புங்கன் மரம் 'டீசல் மரம்" என்ற புதிய நாமகரணம் பெறும் !

புங்கன் ஓர் எண்ணெய் மரம்; இதன் பயோ டீசலில் கார்கள்; ஓட்டலாம்;   உயவு எண்ணெயாக உபயோகப் படுத்தலாம்;  பெயிண்ட் மற்றும் வார்னிஷ் செய்யலாம் ;  சோப்பு செய்யலாம்; சீப்பு செய்ய பிளாஸ்டிக் செய்யலாம்;  பூச்சிகளைக் கொல்ல  மருந்து தயாரிக்கலாம் ;மனிதரைப் பாதுகாக்கவும் மருந்து தயாரிக்கலாம்.

ஆராய்ச்சியாளர்களுக்கு ஓர் கேள்வி. ஏப்போது புங்க மரத்தை டீசல் மரமாக அறிமுகம் செய்யப் போகிறீர்கள் ?

பூமி ஞானசூரியன்