பெண்குழந்தை பாதுகாப்பு
(ஓசோன் பனிக்காற்றாய் வீசும்
அதிகாலைப்பொழுது. சாமக்கோடாங்கி
சங்கரலிங்கம் பொதுவான குறி சொல்லியபடி
குறுகலான ஒரு கிராமத்து சாலையில்
நடந்து போகிறான். சாலையின்
இரு பக்கத்திலும் ஆழ்ந்த உறக்கத்தில்
இருக்கும் கூரை வீடுகள். ஒரு சிலரின்;
காதுகள்மட்டும் கோடாங்கியின்
குரலுக்காகவும் குடுகுடுப்பையின்
தாள லயத்துக்காகவும்; காத்திருக்கின்றன.
அவர்களுக்கு தெரியும் கோடாங்கியின்
வாக்கு கோடிப் பொன்னுக்கு நிகர் என்று)
கோடாங்கி: நல்ல காலம் பொறக்குது
நல்ல காலம் பொறக்குது …
நல்ல காலம் பொறக்குது
அம்மா தாயி …
மாரி மகமாயி
மணிமந்திர சேகரியே …
ஆயி உமையே
அகிலாண்ட ஈஸ்வரியே …
தேவி ஜக்கம்மா
ராக்கு சொடலை …
இருவாச்சி மதுரகாளி
திருவேற்காடு கருமாரி
திருக்கடவூர் அபிராமி
தில்லை சிவகாமி …
காஞ்சி காமாட்சி
கவனமா சொல்லு தாயி …
காசி விசாலாட்சி
கருத்தா சொல்லு தாயி ….
மதுரை மீனாட்சி
மறைக்காம சொல்லு தாயி ….
ஜனங்களா கேளுங்க
ஜக்கம்மா வாக்கு இது …
மக்களா கேளுங்க
மகமாயி வாக்கு இது …
இந்த மண்ணு மனையப்பத்திப்
பாத்தேன்
குறையில்ல …
வீடு வாசலைப் பத்திப் பாத்தேன்
குறையில்ல …
இந்த வீட்டுல வாழுமான
கொம்பனப்பத்திப் பாத்தேன்
குறையில்ல …
மனைவி மக்களப்பத்திப் பாத்தேன்
குறையில்ல …
குழந்தை குட்டியப்பத்திப் பாத்தேன்
குறையில்ல …
மழை மாரியப் பத்திப் பாத்தேன்
குறையில்ல …
காடு கழனியப் பத்திப் பாத்தேன்
குறையில்ல …
பயிர்பச்சையப்பத்திப் பாத்தேன்
குறையில்ல …
மாடு கண்னைப் பத்திப் பாத்தேன்
குறையில்ல …
கோழிக் குஞ்சப் பத்திப் பாத்தேன்
குறையில்ல …
நீங்க தொட்டகாரியம் துலங்கும்னு
ஆத்தா சொல்றா தாயி
(ஒரு குடிசையிலிருந்து வயதான பெண்மணியின் கரகரப்பான குரல் கேட்கிறது)
கோடாங்கி … கோடாங்கி …
கோடாங்கி: இருட்டோட இருட்டா குரல் கொடுக்கறது
ஆரு தாயி …?
குரல்: என்னக்கோடாங்கி என்னத்தெரியலையா …? நீ வருவே வருவேன்னு பாத்துபாத்து கண்ணு பூத்து போச்சி …
(அந்த குரலுக்கு சொந்தக்காரர் அஞ்சலை. கோடாங்கிக்கு ஏற்கனவே பரிச்சயமானவர். கொஞ்சம் விவகாரமான பெண்மணி;)
கோடாங்கி: என்னா சமாச்சாரம்னு சொல்லு தாயி …
அஞ்சலை: கோடாங்கி …ரகசியமா ஒங்கிட்ட ஒரு விஷயம் சொல்லணும் … காதைக் கொஞ்சம் குடு …
கோடாங்கி: அட எங்காது எனக்கு வேணும் தாயி …எனக்கு இருக்கறதே ரெண்டு காது தாயி …எக்ஸ்ட்ராவா இருந்தாலும் குடுக்கலாம். …
அஞ்சலை: அட ரகசியமான விஷயம் கோடாங்கி …
கோடாங்கி: சும்மா சொல்லு தாயி …ஆத்தாவுக்கு தெரியாத ரகசியம் என்ன தாயி இருக்குது ஓலகத்துல சொல்லு தாயி …
அஞ்சலை: அது ஒண்ணுமில்ல கோடாங்கி … எம்மருமக முழுகாம இருக்கறா … ஆஸ்பத்ரிக்குப் போயி சோதனைப் பண்ணி பாத்தா புள்ளை …ஆம்பளையா …? பொம்பளையான்னு தெரிஞ்சிடும் … வாடின்னா வரமாட்டேங்கறா …
கோடாங்கி: தெரிஞ்சி என்னாப் பண்ணப்போற தாயி …?
குரல்: ஆம்பள புள்ளன்னா வச்சிக்கிடலாம் …பொம்பள புள்ளன்னா கலைச்சிடலாம் இல்லையா கோடாங்கி …?
கோடாங்கி: நீ … என்னா தாயி சொல்ற …?
குரல்: கோடாங்கி … நீ ஏதாவது வசியமருந்து குடுத்தேன்னு வச்சிக்க … எம்மருமக நாஞ்சொல்றத கேப்பா … ஆஸ்பத்ரிக்கு வாடின்னா
வருவா … என்ன சொல்ற கோடாங்கி …?
கோடாங்கி :--மருமகள மசியவைக்க
வசிய மருந்து கேக்கற …
இந்த மாமியாருக்கு
நேரம் சரியில்ல …
நிலமை சரியில்லன்னு ஆத்தா சொல்லுது …
கொலை பாதகம்
செய்யறதுக்கு – குறிகேக்கற
இந்த கூனி மாமியாருக்கு …
கிரகம் சரியில்ல …நரகம் ரெடின்னு
கருத்தமாரி கறாரா சொல்லுது தாயி …
அஞ்சலை: என்னா கோடாங்கி …
எனக்கு சரியில்லேன்னு சொல்ற…?
கோடாங்கி: ஆமா தாயி … பொம்பள புள்ளையா இருந்தா
கருவை கலைப்பேன்னு … இன்னொரு தடவை சொல்லாத தாயி … ஆத்தாளே பொம்பளதான தாயி …
அஞ்சலை: ஆமா ஆத்தா பொம்பளதான் …
கோடாங்கி: ஆத்தாளை கலைக்கலாமா தாயி …?
அஞ்சலை: அய்யய்யோ தப்பு கோடாங்கி … தெரியாம கேட்டுட்டேன் கோடாங்கி …
கோடாங்கி: கருவில் இருப்பது
ஆண்குழந்தையா
பெண்குழந்தையான்னு
ஆஸ்பத்திரியில
உள்ள கேட்டாலும்
வெளிய கேட்டாலும்
அடுத்த நிமிஷமே ஜெயில்ன்னு
சட்டம் இருக்குன்னு
திட்டம் இருக்குன்னு
ஆத்தா சொல்றா தாயி
அஞ்சலை: அப்பிடியா கோடாங்கி ?
கோடாங்கி: அதுமட்டுமில்ல..
பொண்ணு பொறந்தா
பொன்ன குடுக்கும்
பொருளக் குடுக்கும்
குடும்பவாரிச அள்ளிக் குடுக்கும்…
ஆணுக்கு பொண்ணு
அட்டியில்ல மட்டமில்லன்னு
ஆத்தா சொல்லுது நான் வரேன் தாயி…
அஞ்சலை: நல்லவேளை… கோடாங்கி வரல்லேன்னா
இண்ணைக்கு ஜெயிலுக்கு போயிருப்பேன்..
கோடாங்கி: …நல்ல காலம் பொறக்குது …
நல்ல காலம் பொறக்குது …
அம்மா தாயி அம்மா தாயி …
(கோடாங்கி அடுத்த தெருவில் இறங்கி நடந்தார்)
.jpg)
No comments:
Post a Comment